ករណីគ្រោះថ្នាក់ចរាចរណ៍ខាងលើនេះដែរ បានកើតឡើងនៅព្រឹកថ្ងៃទី១៩ ខែមេសា ឆ្នាំ២០១៧ នៅត្រង់ចំណុចលើកំណាត់ផ្លូវជាតិលេខ៥ ស្ថិតក្នុងក្រុម២ ភូមិខ១ សង្កាត់ច្រាំងចំរេះទី២ ខណ្ឌឫស្សីកែវ រាជធានីភ្នំពេញ។
លោកលី រ៉ូហ្សាត នាយផ្នែកចរាចរខណ្ឌឫស្សីកែវ បានបញ្ជាក់ថា អ្នកបើកបរមានឈ្មោះកែវ រ៉ានី អាយុ២៧ឆ្នាំ មុខរបរកម្មករលីសែង ស្នាក់នៅភូមិព្រែកជីក ឃុំសំបួរមាស ស្រុកកំពង់សៀម ខេត្តកំពង់ចាម និងជាអ្នកបើកបរម៉ូតូម៉ាកសឺរុស ពណ៌ខ្មៅលាយក្រហម ពាក់ស្លាកលេខ ភ្នំពេញ1CC-5658 និងម្នាក់ទៀត ដែលជិះពីក្រោយឈ្មោះ ឌី បានរត់គេចខ្លួនបាត់បន្ទាប់ពីកើតហេតុ។ រីឯជនរងគ្រោះឈ្មោះ ជិន សុខជា អាយុ៦២ឆ្នាំ ជនជាតិវៀតណាម មុខរបរនៅផ្ទះ ស្នាក់នៅក្បែរចំណុចកើតហេតុ និងមានស្រុកកំណើតនៅភូមិផ្សារក្រោម ឃុំចុងកោះ ក្នុងទីរួមខេត្តកំពង់ឆ្នាំង។
បច្ចុប្បន្ន ជនបង្កម្នាក់ក្នុងចំណោម២នាក់ ដែលបានបើកម៉ូតូទៅបុកជនរងគ្រោះបណ្ដាលឲ្យស្លាប់ រួមជាមួយវត្ថុតាងម៉ូតូ១គ្រឿង ត្រូវបានកម្លាំងនគរបាលខណ្ឌឫស្សីកែវ បញ្ជូនទៅកាន់ការិយាល័យនគរបាលចរាចរក្រុងភ្នំពេញ ដើម្បីបន្តនិតិវិធី៕
