ឃាត់ខ្លួន​ជនជាតិ​វៀតណាម៤នាក់ ពីបទ​កាប់បំផ្លាញ​ព្រៃឈើ នៅក្នុង​តំបន់ការពារធម្មជាតិ ស្រុក​កោះ​ញែក

មណ្ឌលគិរី ៖ ជនជាតិវៀតណាមចំនួន៤នាក់ ត្រូវបានមន្ត្រីឧទ្យានុរក្សដែន ជម្រកសត្វព្រៃស្រែពក ចាប់ឃាត់ខ្លួនកាលពីវេលាម៉ោង១១និង៥០នាទី ព្រឹកថ្ងៃទី២៧ ខែមីនា ឆ្នាំ២០១៧ ពីបទកាប់បំផ្លាញព្រៃឈើនៅក្នុងតំបន់ ការពារធម្មជាតិ ស្ថិតក្នុងភូមិកោះម្យើល ឃុំណងឃីលឹក ស្រុកកោះញែក ខេត្តមណ្ឌលគិរី។

វត្ថុតាងល្មើសដែលត្រូវសមត្ថកិច្ចបរិស្ថានដកហូតរួមមាន៖ រណារយន្ត ៣គ្រឿងម៉ូតូ៤គ្រឿង និងឈើប្រភេទលេខ១(សុក្រំនិងផ្ចឹក)ចំនួន ២០ដើមត្រូវបានកាប់រំលំរួចហើយ។
ក្រោយពីឃាត់ខ្លួន សមត្ថកិច្ចជំនាញបរិស្ថានបានយកវត្ថុតាងម៉ូតូ៤គ្រឿង ទៅរកទុកនៅស្នាក់ការម្រើច នៃដែនជម្រកសត្វព្រៃស្រែពក រីឯរណារយន្តចំនួន៣គ្រឿងយកមករក្សាទុកនៅមន្ទីរបរិស្ថានខេត្ត។ចំណែកជនសង្ស័យជាជនជាតិវៀតណាម ទាំង៤នាក់ត្រូវបានសមត្ថកិច្ចជំនាញកសាងសំណុំរឿងចាត់ការបន្តតាមនីតិវិធី៕